শনিবাৰে পশ্চিম বংগৰ মিদনাপুৰ জিলাত সংঘটিত হৈছে এক ভয়ংকৰ দুৰ্ঘটনা। এখন তীব্ৰবেগী ট্ৰাকৰ খুন্দাত ৬ জন লোকে মৃত্যুক সাৱটি লোৱাৰ খবৰ আহিছে।
জিলাখনৰ খৰগপুৰত সংঘটিত ঘটনাত গুৰুতৰভাৱে আহত হোৱা আন চাৰিজন লোক চিকিৎসালয়ত চিকিৎসাধীন হৈ আছে।
দুৰ্ঘটনাত পতিত হোৱা আটাইকেইজন পেছাত ফুল বিক্ৰেতা আছিল।
আৰক্ষীয়ে জনোৱা মতে, খড়গপুৰ আৰক্ষী থানাৰ অন্তৰ্গত বুৰোমালা অঞ্চলৰ মূল পথৰ কাষতে ৰখাই থোৱা এখন পিকআপ ভ্যানত ফুল ভৰাই থকা অৱস্থাত হঠাৎ চিমেণ্ট ভৰ্তি এখন ট্ৰাক তেওঁলোকক মহতিয়াই লৈ যায়।
ঘটনাটোত তিনিজন লোকৰ থিতাতে মৃত্যু হোৱাৰ বিপৰীতে স্থানীয় চিকিৎসালয়লৈ নিয়াৰ পিছত আন তিনিজন লোকৰ মৃত্যু হয়।
আৰক্ষীয়ে জনোৱা মতে, চিকিৎসালয়ত ভৰ্তি হোৱা আন চাৰিজন লোকৰ অৱস্থা অতি সংকটজনক।
দুৰ্ঘটনা সংঘটিত হোৱাৰ লগে লগে স্থানীয় ৰাইজে প্ৰাথমিক উদ্ধাৰ অভিযান আৰম্ভ কৰে যদিও পিছত খৰগপুৰ থানাৰ আৰক্ষীয়ে সেই স্থানত উপস্থিত হৈ মৃতদেহকেইটা মৰণোত্তৰ পৰীক্ষাৰ বাবে চিকিৎসালয়লৈ প্ৰেৰণ কৰে।
মৃত আৰু আহতসকলৰ পৰিচয় এতিয়াও প্ৰকাশ কৰা নাই আৰক্ষীয়ে।
ইফালে, আন এক পৃথক ঘটনাত আজি পুৱা বাংকুৰা জিলাৰ ৰাষ্ট্ৰীয় ঘাইপথত তীব্ৰবেগী ট্ৰাকে খুন্দা মৰাৰ ফলত আন এজন ব্যক্তিৰ মৃত্যু হয়।