শুকুৰবৰীয়া জুম্মা নামাজৰ দিনাই বিস্ফোৰণত কঁপি উঠিল পাকিস্তান। আজি উত্তৰ-পশ্চিম পাকিস্তানত আৰক্ষীক লক্ষ্য কৰি সংঘটিত কৰা বোমা বিস্ফোৰণত ৫জন লোক নিহত হোৱাৰ খবৰ আহিছে।
বিস্ফোৰণৰ পিছতে ঘটনাস্থলত উপস্থিত হোৱা উদ্ধাৰকাৰী আৰু আৰক্ষীৰ লোকসকলে এই তথ্য প্ৰদান কৰে।
আৰক্ষী বিষয়া মহম্মদ আদনানে জনোৱা মতে, ডেৰা ইছমাইল খান চহৰত আৰক্ষীৰ টহলদাৰী দলৰ সমীপতে বোমাটো বিস্ফোৰণ ঘটে।
উদ্ধাৰকাৰী বিষয়া আইজাজ মেহমুদে কয় যে ৫জন লোক নিহত হোৱাৰ লগতে আন ২১জন লোক আহত হৈছে।
উদ্ধাৰকাৰী দলে ভয়ংকৰ বিস্ফোৰণটোত আহত হোৱা লোকসকলক নিকটৱৰ্তী হাস্পতাললৈ প্ৰেৰণ কৰে।
সম্প্ৰতি এই বিস্ফোৰণৰ দায়িত্ব কোনো সন্ত্ৰাসবাদী সংগঠনে লোৱা নাই যদিও সমগ্ৰ অঞ্চলটোত নিৰাপত্তা কটকটীয়া কৰি তুলিছে।
উল্লেখ্য যে, পাকিস্তানত বিগত দুই-তিনিমাহৰ ভিতৰত সংঘটিত কেইবাটাও বোমা বিস্ফোৰণত প্ৰায় ডেৰ শতাধিক লোক নিহত হৈছে।