গাজাক চাৰিওফালৰ পৰা আগুৰি ধৰিছে ইজৰাইলী সেনাই । ইজৰাইলী সেনাৰ মুখপাত্র ডেনিয়েল হাগাৰীয়ে শেহতীয়াকৈ গাজা চহৰৰ চৌদিশ আগুৰি ধৰিছে ইজৰাইলী সেনাই । ইজৰাইলে আকৌ এবাৰ গাজাৰ নাগৰিকসকলক দক্ষিণলৈ যাবলৈ কৈছে । ইজৰাইলৰ প্ৰধানমন্ত্ৰী বেঞ্জামিন নেতানিয়াহুৱে এক বিবৃতিত উল্লেখ কৰিছে , “মই সকলো অ-যুঁজাৰুক দক্ষিণলৈ যাবলৈ অনুৰোধ জনাইছো। আমি হামাছ সন্ত্ৰাসবাদীক নিৰ্মূল কৰিবলৈ আমাৰ পদক্ষেপ বন্ধ নকৰো। আমি আগবাঢ়ি যাম আৰু জিকিম। আমি নিশ্চিতভাৱে ঈশ্বৰৰ সহায়ত আৰু আমাৰ বীৰ সৈনিকসকলৰ সহায়ত এইটো কৰিবলৈ সক্ষম হ’ম। ইজৰাইলৰ গোটেই মানুহে বিজয়ৰ মুহূৰ্তলৈকে সৈনিকসকলৰ সৈতে থিয় হৈ আছে।
ইফালে হামাছে কয় যে, গাজা ইজৰাইলৰ বাবে অভিশাপ হিচাপে প্ৰমাণিত হ’ব। লগতে হামাছে হুংকাৰ দিছে ‘আমি ইজৰাইলী সেনাক মোনাত ভৰাই উভতাই পঠিয়াম’।
পেলেষ্টাইনৰ স্বাস্থ্য মন্ত্ৰ্যালয়ে কয় যে, ৭ অক্টোবৰৰ পৰা গাজাত ইজৰাইলৰ আক্ৰমণত ক’মেও ৯,০৬১ জন লোক নিহত হৈছে। ইয়াৰ ভিতৰত, ৩৭৬০ টি শিশু। ইজৰাইল-হামাছ যুদ্ধ ৭ অক্টোবৰত আৰম্ভ হৈছিল, যেতিয়া হামাছে দক্ষিণ ইজৰাইল আক্ৰমণ কৰিছিল। সেই ঘটনাত ১৪০০ জন লোকৰ মৃত্যু হৈছিল। একে সময়তে, হামাছে শ শ নাগৰিকক জিম্মাত লৈছিল।