মহাৰাষ্ট্ৰৰ যৱতমাল জিলাত সংঘটিত হৈছে এক হৃদয় বিদাৰক দুৰ্ঘটনা। মঙলবাৰে পুৱা এখন অটোৰিক্সা নলাত পৰি যোৱাৰ ফলত ৬গৰাকী লোকৰ মৃত্যু হয়।
আৰক্ষীয়ে জনোৱা মতে, পুৱা প্ৰায় ১১ বজাত সংঘটিত হয় এই দুৰ্ঘটনা। পুছাদ (গ্ৰাম্য) আৰক্ষী থানাৰ পৰিদৰ্শক ৰাজেশ ৰাথোড়ে জনোৱা মতে, নাগপুৰৰ পৰা ২৬০ কিলোমিটাৰ নিলগৰ পুছাদৰ জৱাহৰ নগৰৰ বাসিন্দা গণেশ ৰাথোড়ৰ পৰিয়ালৰ প্ৰায় ১৫ জন লোকে এখন বাহনেৰে উমৰি পোহৰা দেৱীলৈ গৈ আছিল।
এই সময়তে গাড়ীখনে এখন দলঙৰ ওপৰত নিয়ন্ত্ৰণ হেৰুৱাই দলঙৰ পৰা তলত পৰি যায়। দুৰ্ঘটনাটোৰ ফলত গাড়ীখনত থকা ৬ জন লোকৰ থিতাতে মৃত্যু ঘটে। ঘটনাটোত কম বেছি পৰিমানে আঘাতপ্ৰাপ্ত হয় বাকী লোককেইজন।
পিছত স্থানীয় লোকৰ খবৰৰ ভিত্তিত আৰক্ষীৰ লোক উপস্থিত হৈ মৃতদেহ কেইটা উদ্ধাৰ কৰি মৰণোত্তৰ পৰীক্ষাৰ বাবে প্ৰেৰণ কৰে। ঘটনাৰ কাৰণ জানিবলৈ আৰক্ষীয়ে তদন্ত আৰম্ভ কৰা বুলি জনাইছে।