জম্মু-কাশ্মীৰৰ বাৰামুল্লা জিলাৰ বুজথালান তাৎমুল্লা অঞ্চলত বুধবাৰে এখন যাত্ৰীবাহী বাছ দ’ খাৱৈত বাগৰি পৰাৰ ফলত ৭ জন লোক নিহত হোৱাৰ লগতে ৮ জন লোক আহত হয়।
আৰক্ষীয়ে জনোৱা মতে, আজি বিয়লি উৰিলৈ গৈ থকা অৱস্থাত বাছখনে নিয়ন্ত্ৰণ হেৰুৱাই পথৰ পৰা খাৱৈত পৰি যায়।
স্থানীয় লোক আৰু বিষয়াসকলে ক্ষীপ্ৰতাৰে উদ্ধাৰ অভিযান আৰম্ভ কৰে আৰু এই পৰ্যন্ত ঘটনাস্থলৰ পৰা ৭টা মৃতদেহ উদ্ধাৰ কৰা হৈছে। মৃত্যুৰ সংখ্যা বৃদ্ধি পোৱাৰ আশংকা ব্যক্ত কৰা হৈছে।
ইফালে দুৰ্ঘটনাত আহত হোৱা লোকসকলক ওচৰৰে এখন চিকিৎসালয়লৈ লৈ যোৱা হৈছে য’ত তেওঁলোকৰ চিকিৎসা চলি আছে।
তুষাৰপাতৰ বাবে পথটো অত্যধিক পিছল হৈ আছিল আৰু তাৰ ফলতেই বাছখন দুৰ্ঘটনাত পতিত হোৱা বুলি এগৰাকী বিষয়াই জানিব দিয়ে। বিষয়াগৰাকীয়ে লগতে টায়াৰত শিকলি বান্ধি পিছল পথত যাতায়ত কৰিবলৈ পুনৰবাৰ ৰাইজক আহ্বান জনায়।