মঙলবাৰে নিশা গুৱাহাটী মহানগৰীত সংঘটিত হৈছে ভয়ংকৰ পথ দুৰ্ঘটনা। উলুবাৰীৰ বি বৰুৱা মহাবিদ্যালয়ৰ সমীপৰ উৰণ সেতুত সংঘটিত পথ দুৰ্ঘটনাটোত দুজন লোকৰ মৃত্যু হোৱাৰ লগতে আন দুজন লোক গুৰুতৰভাৱে আহত হয়।
দুখন বাইকৰ মাজত হোৱা সংঘৰ্ষৰ ফলতেই এই কৰুণ ঘটনাটো সংঘটিত হোৱা বুলি জানিব পৰা গৈছে।
দুৰ্ঘটনাটোত মৃত্যু হোৱা লোক দুজনক ৰাকেশ দাস আৰু পৰৱেশ্বৰ ডেকা বুলি চিনাক্ত কৰা হৈছে। মৃত দুয়োজন সম্পৰ্কীয় আছিল আৰু তেওঁলোক শিলপুখুৰীত ভাড়াঘৰত বাস কৰিছিল।
দুৰ্ঘটনাৰ তথ্য লাভ কৰাৰ পিছতে ঘটনাস্থলত ভঙাগড় আৰক্ষী উপস্থিত হৈ মৃতদেহ দুটা উদ্ধাৰ কৰি মৰণোত্তৰ পৰীক্ষাৰ বাবে প্ৰেৰণ কৰাৰ লগতে আহত লোক দুজনকো চিকিৎসাৰ বাবে জি এম চি এইচ্চলৈ প্ৰেৰণ কৰে।
নিয়ম উলংঘা কৰি তীব্ৰ বেগত অহাৰ বাবেই এই ভয়ংকৰ দুৰ্ঘটনাটো সংঘটিত হোৱা বুলি স্থানীয় ৰাইজে সংবাদ মাধ্যমক জানিবলৈ দিয়ে।