উত্তৰ প্ৰদেশৰ চিত্ৰকূটৰ বুণ্ডেলখণ্ড গৌৰৱ মহোৎসৱত ভয়ংকৰ ঘটনা। মহোৎসৱৰ সময়ত চিত্ৰকূট আন্তঃ মহাবিদ্যালয়ত চলি থকা মেলাত দিয়া এখন অস্থায়ী দোকানত চিলিণ্ডাৰ বিস্ফোৰণ ঘটি তিনিজন লোকৰ মৃত্যু হয়।
চিলিণ্ডাৰ বিস্ফোৰণৰ লগে লগে দোকানখনত ভয়ংকৰ অগ্নিকাণ্ড সংঘটিত হয় আৰু এই অগ্নিকাণ্ডত তিনিজন লোকে কৰুণ মৃত্যুক আকোঁৱালি লোৱাৰ উপৰি আন কেইবাজনো লোক আহত হোৱা বুলি খবৰ পোৱা গৈছে।
আহত লোকসকলৰ ভিতৰত এজন লোকৰ অৱস্থা সংকটজনক আৰু তেওঁক বৰ্তমান জিলা হাস্পতালত ভৰ্তি কৰোৱা হৈছে।
ঘটনা সংঘটিত হোৱাৰ পিছতে ঘটনাস্থলত আৰক্ষী, এম্বুলেঞ্চ, অগ্নিনিৰ্বাপক বাহিনী আৰু জিলা প্ৰশাসনৰ গাড়ীসমূহ ঘটনাস্থলত উপস্থিত হৈ জুই নিৰ্বাপনৰ চেষ্টা চলোৱাৰ লগতে উদ্ধাৰ অভিযান আৰম্ভ কৰে।
জানিব পৰা অনুসৰি, বিস্ফোৰণ হোৱাৰ পিছতে চিলিণ্ডাৰটো প্ৰায় ৫০ ফুট ওপৰলৈ উৰি গৈছিল।