তামিলনাডুৰ বিৰুধুনগৰ জিলাস্থিত এটা ফটকাৰ কাৰখানাত সংঘটিত ভয়ংকৰ বিস্ফোৰণত ৯ জন লোকৰ মৃত্যু হোৱাৰ লগতে আন বহু লোক আহত হোৱাৰ খবৰ আহিছে।
শনিবাৰে সংঘটিত এই বিস্ফৰণটো ইমানেই শক্তিশালী আছিল যে কাৰাখানাটোৰ উপৰি সমীপতে থকা আন চাৰিটা অট্টালিকাৰো বিস্তৰ ক্ষতিসাধন হয়।
ঘটনাটো সংঘটিত হোৱাৰ পিছতে ঘটনাস্থলত আৰক্ষীৰ লগতে অগ্নিনিৰ্বাপক বাহিনীৰ লোক উপস্থিত হৈ উদ্ধাৰ অভিযান আৰম্ভ কৰে। আহত লোকসকলক ওচৰৰে হাস্পতালত ভৰ্তি কৰোৱা হৈছে।
আৰক্ষীয়ে জনোৱা মতে, ঘটনাটোত ৭ জন লোকৰ থিতাতে মৃত্যু হোৱাৰ বিপৰীতে আন দুজন লোক হাস্পতাললৈ লৈ অনা অৱস্থাত মৃত্যু হয়।
ঘটনাৰ প্ৰাৰম্ভিক অনুসন্ধানত প্ৰকাশ পাইছে যে কাৰখানাটোৰ ৰাসায়নিক মিশ্ৰণ কক্ষৰ পৰাই বিস্ফোৰণটো সংঘটিত হৈছিল। অৱশ্যে অব্যাহত আছে আৰক্ষীৰ অনুসন্ধান।
ভেম্বাকোট্টাই নামৰ এখন ঠাইত থকা এই কাৰখানাটোৰ মালিক হৈছে বিজয়।
উল্লেখ্য যে, যোৱা বছৰো ৰাজ্যখনৰ কৃষ্ণাগিৰি নামৰ ঠাইত থকা ফটকা কাৰখানাত বিস্ফোৰণত ৮ জন লোকে প্ৰাণ হেৰুৱাইছিল।