তামিলনাডুত সংঘটিত হৈছে এক ভয়ংকৰ পথ দুৰ্ঘটনা। এখন তীব্ৰবেগী এছ ইউ ভিয়ে ঘাইপথৰ ডিভাইডাৰত খুন্দা মৰাৰ ফলত ৫জন লোকৰ মৃত্যু হয়। মৃত লোকসকলৰ চাৰিজন একেটা পৰিয়ালৰ আছিল।
বিৰুধুনগৰ-মাদুৰাই ঘাইপথত সংঘটিত হোৱা দুৰ্ঘটনাটোৰ চিচিটিভি ফুটেজ মাদুৰাইৰ আৰক্ষীয়ে প্ৰকাশ কৰে। য’ত স্পষ্টকৈ দেখা যায় যে দ্ৰুতবেগী এখন বগা ৰঙৰ এছ ইউ ভি বাহনে ডিভাইডাৰত খুন্দা মাৰি ঘাইপথতে কেইবালুটি খোৱা দেখা যায়।
এই দুৰ্ঘটনা ইমানেই ভয়ংকৰ আছিল যে ঘটনাস্থলী কেৱল ধূলীময় হৈ পৰিছিল। চাৰিলেনযুক্ত ঘাইপথৰ সিটো পাৰত এখন দুচকীয়া বাহনক খুন্দিয়াই পথৰ আন এটা লেনত প্ৰৱেশ কৰি গাড়ীখন বাগৰি পৰে।
ফুটেজত দেখা গৈছে যে মটৰ চাইকেল লৈ ৰৈ থকা এজন লোকে এছ ইউ ভিখনৰ খুন্দাৰ পৰা কথমপি ৰক্ষা পৰে।
মাদুৰাই জিলাৰ আৰক্ষী অধীক্ষক অৰবিন্দই জনোৱা মতে, বিৰুধুনগৰ-মদুৰাই ঘাইপথৰ তিৰুমংগলমৰ সমীপৰ শিৱৰাকোট্টাইত এখন তীব্ৰবেগী এছ ইউ ভি এখনে মপেডত খুন্দা মৰাৰ ফলত মাদুৰাইৰ ভিলাপুৰমৰ চাৰিজন পৰিয়ালৰ সদস্যসহ পাঁচজন লোক নিহত হয়।