আফগানিস্তানৰ কাবুল-জালালাবাদ ঘাইপথৰ চুৰুবি জিলাত সংঘটিত হৈছে এক ভয়ংকৰ পথ দুৰ্ঘটনা। এই দুৰ্ঘটনাত ৫জন লোক নিহত হোৱাৰ লগতে আন এজন লোক গুৰুতৰভাৱে আহত হয়।
ছিনহুয়া নামৰ সংবাদ সংস্থাৰ প্ৰতিবেদন অনুসৰি বুধবাৰে নিশা সংঘটিত হৈছিল এই শিহৰণকাৰী পথ দুৰ্ঘটনাটো।
কাবুল আৰক্ষীৰ মুখপাত্ৰ খালেদ জাদ্ৰানে নিজৰ এক্স (পূৰ্বৰ টুইটাৰ) একাউণ্টৰ জৰিয়তে এটা প’ষ্ট কৰি কয় যে এই দুৰ্ঘটনাত ৫ জন লোকৰ মৃত্যু হোৱাৰ লগতে আন এজন আহত হয়।
বৰ্তমান দুৰ্ঘটনা সংঘটিত হোৱা স্থানৰ ওচৰতে থকা এখন চিকিৎসালয়ত চিকিৎসাধীন হৈ আছে আহত লোকজন।
উল্লেখ্য যে, আফগানিস্তানত পথৰ শোচনীয় অৱস্থা, অসাৱধানতাৰে গাড়ী চলোৱা, কঠিন ভূখণ্ড, অতিৰিক্ত বোজা, অভাৰটেকিং আৰু দ্ৰুতবেগত গাড়ী চলোৱাৰ বাবে পথ দুৰ্ঘটনা সংঘটিত হোৱা দেখা যায়।