বিশ্বকাপৰ ইতিহাসত পূৰ্বে কেতিয়াও নোহোৱা ঘটনা ঘটিল ২০২৩ চনৰ বিশ্বকাপত, এদিনতে দুটা বিশেষ অভিলেখ
বিশ্বকাপ ২০২৩ বহু পৰিমানে বিশেষ বুলি প্ৰমাণিত হ’ব। প্ৰতিখন মেচৰ লগে লগে এই প্ৰতিযোগিতাত নতুন অভিলেখ গঢ় লৈ উঠিছে আৰু পুৰণি পৰিসংখ্যা সলনি হৈছে।
আফগানিস্তান আৰু শ্ৰীলংকাৰ মাজত হোৱা খেলখনৰ ফলাফলত এই বিশ্বকাপ অধিক বিশেষ হৈ পৰিল। এই মেচখনৰ পৰাই প্ৰতিযোগিতাখনত দুটা নতুন আশ্চৰ্য্য ঘটিল।
ইয়াৰ অধীনত বিশ্বকাপত প্ৰথমবাৰৰ বাবে নিম্নস্তৰৰ দলে শীৰ্ষ আঠটা দলৰ বিৰুদ্ধে চাৰিখন মেচত জয়লাভ কৰিছে। লগতে আফগানিস্তান হৈছে একেটা বিশ্বকাপতে তিনিখন সম্পূৰ্ণ সদস্য দেশক পৰাস্ত কৰা প্ৰথমটো দল।
বৰ্তমান এই বিশ্বকাপত ১৯খন খেল বাকী আছে আৰু সেইটোৱে ইয়াক অতি বিশেষ কৰি তুলিব পাৰে।
বৰ্তমান আইচিচিৰ ৰেংকিঙত নৱম স্থানত আছে আফগানিস্তান। কিন্তু এই বিশ্বকাপত ৰেংকিঙৰ শীৰ্ষ তিনিটা দলক পৰাস্ত কৰিছে।
প্ৰথমে ইংলেণ্ডক পৰাস্ত কৰিছিল, তাৰ পিছত পাকিস্তান আৰু এতিয়া শ্ৰীলংকাক পৰাস্ত কৰিছে।
আমোদজনক কথাটো হ’ল আফগানিস্তানে জয়ী হোৱা তিনিওখন মেচ বিশ্ব চেম্পিয়ন দলৰ বিৰুদ্ধে। ইংলেণ্ডে ২০১৯ চনত বিশ্বকাপ, ১৯৯২ চনত পাকিস্তান আৰু ১৯৯৬ চনত শ্ৰীলংকাই বিশ্বকাপ জয় কৰিছিল।
এইদৰে আফগানিস্তান হৈছে প্ৰথমটো দল যিয়ে এটা বিশ্বকাপত তিনিখন সম্পূৰ্ণ সদস্য দেশৰ বিৰুদ্ধে জয়লাভ কৰিছে।
এতিয়া তেওঁলোকে পৰৱৰ্তী মেচত অষ্ট্ৰেলিয়াক পৰাস্ত কৰাৰ সোণালী সুযোগ পাব।
আনহাতে ২০২৩ চনটোৱেই হৈছে প্ৰথমটো বিশ্বকাপ য’ত শীৰ্ষ আঠটা দলৰ ভিতৰত (অষ্ট্ৰেলিয়া/ইংলেণ্ড/ভাৰত/নিউজিলেণ্ড/পাকিস্তান/দক্ষিণ আফ্ৰিকা/শ্ৰীলংকা/ৱেষ্ট ইণ্ডিজ) চাৰিটা দলপৰাস্ত হৈছে।
দক্ষিণ আফ্ৰিকা নেদাৰলেণ্ডৰ হাতত পৰাস্ত হোৱাৰ বিপৰীতে ইংলেণ্ড, পাকিস্তান আৰু শ্ৰীলংকা আফগানিস্তানৰ হাতত পৰাস্ত হ’বলগীয়া হৈছিল।
উল্লেখ্য যে প্ৰথমবাৰৰ বাবে আফগান দলটোৱে বিশ্বকাপত মুঠ তিনিখন আৰু একেৰাহে দুখন খেলত জয়লাভ কৰিছে। এই প্ৰতিযোগিতাখনৰ পূৰ্বে ইয়াৰ নামত মাত্ৰ এটা জয় আছিল যিটো ২০১৫ চনত স্কটলেণ্ডৰ বিৰুদ্ধে আহিছিল।
২০১৯ চনত এই দলটোৱে এখনো মেচত জয়ী হ’ব পৰা নাছিল। এতিয়া তেওঁলোক পৰৱৰ্তী মেচ কেইখনত অষ্ট্ৰেলিয়া, দক্ষিণ আফ্ৰিকা আৰু নেদাৰলেণ্ডৰ সৈতে মুখামুখি হ’ব লাগিব। এনে পৰিস্থিতিত দলটোৱে নিজৰ পৰিসংখ্যা উন্নত কৰি বিশ্বকাপত আগবাঢ়ি যোৱাৰ এক সোণালী সুযোগ লাভ কৰিব।
