ক্ৰিকেট বিশ্বত আজি সৰ্বাধিক চৰ্চিত নাম ভাৰতীয় বেগী বলাৰ মহম্মদ ছামী। বিশ্বকাপত অদমনীয় প্ৰদৰ্শনত সকলো অনুৰাগীকে মুগ্ধ কৰা ছামীৰ বিৰুদ্ধে কিন্তু এটা সময়ত উত্থাপিত হৈছিল মেচ ফিক্সিঙৰ দৰে গুৰুতৰ অভিযোগ।
সেই সময়ছোৱাত ক্ৰিকেটাৰগৰাকীয়ে কি অৱস্থাৰ মাজেৰে পাৰ হৈছিল সেই কথা জানিলে আপোনাৰো চকুলো সেমেকি উঠিব।
শেহতীয়াকৈ মহম্মদ ছামীৰ এটা পুৰণি ভিডিঅ’ ভাইৰেল হৈ পৰিছে, য’ত তেওঁ দৰ্শকৰ আগত নিজৰ মনৰ কথা প্ৰকাশ কৰি দেশক বিশ্বাসঘাতকতা কৰাতকৈ মৃত্যুৱেই শ্ৰেষ্ঠ বুলি কোৱা দেখা গৈছে।
পুৰণি ভিডিঅ’টো বৰ্তমান পুনৰ ছ’চিয়েল মিডিয়াত দ্ৰুতগতিত ভাইৰেল হৈ আছে।
টুইটাৰত ডাঃ ছৈয়দ ৰিজৱান আহমেদ নামৰ এজন লোকে শ্বেয়াৰ কৰিছে ছামীৰ এটা পুৰণি ভিডিঅ’। এই ভিডিঅ’টোত মহম্মদ ছামীয়ে মেচ ফিক্সিঙৰ অভিযোগকে ধৰি নিজৰ মনৰ অনুভৱবোৰ কোৱা দেখা গৈছে।
মেচ ফিক্সিঙৰ দৰে গুৰুতৰ অভিযোগ উত্থাপন হোৱাৰ সময়ত মহম্মদ ছামীয়ে এটা সাক্ষাৎকাৰত কৈছিল যে আজিলৈকে মই যি খেলিছো বা যি প্ৰদৰ্শন কৰিছো সেয়া হৃদয়ৰ পৰা আৰু দেশৰ বাবে কৰা হৈছে আৰু সদায় কৰি যাম। আৰু দেশক বিশ্বাসঘাতকতা কৰাৰ কথা যদি আহে তেন্তে মই দেশক বিশ্বাসঘাতকতা কৰাতকৈ মৃত্যুৱেই ভাল পাম।
এই ভিডিঅ’টো পোষ্ট কৰাৰ সময়ত তেওঁ লিখিছে, ‘ছামী ভাই, আপুনি দেশৰ গৌৰৱ, আপোনাৰ দেশপ্ৰেম সত্য। আপোনাৰ দেশপ্ৰেম, নিষ্ঠা আৰু আবেগক প্ৰণাম।‘
পুৰণি এই ভিডিঅ’টি সম্প্ৰতি ব্যাপক ৰূপত ভাইৰেল হৈ পৰিছে আৰু বহুতে ছামীক ভাৰতৰ গৌৰৱ বুলি অভিহিত কৰিছে।
উল্লেখ্য যে, চলিত বিশ্বকাপত মহম্মদ ছামীয়ে ৬খন মেচত ২৩টা উইকেট দখল কৰিছে। এইবাৰৰ বিশ্বকাপত তেওঁ এতিয়া সৰ্বাধিক উইকেট দখলকাৰীৰ তালিকাৰ শীৰ্ষত।
বুধবাৰে নিউজিলেণ্ডৰ বিৰুদ্ধে অনুষ্ঠিত হোৱা প্ৰতিযোগিতাখনৰ ছেমি ফাইনেলত ছামীয়ে ৯.৫ অভাৰত ৫৭ ৰান খৰছ কৰি ৭টা উইকেট দখল কৰে। ছামীৰ এই দুৰ্দান্ত প্ৰদৰ্শনৰ বাবেই ভাৰতে নিউজিলেণ্ডক পৰাস্ত কৰি ১২ বছৰৰ মূৰত বিশ্বকাপৰ ফাইনেলত প্ৰৱেশ কৰে।
