হামাছক নিঃশেষ কৰাৰ বাবে এইবাৰ ইজৰাইল সেনাই ব্যৱহাৰ কৰিছে সাগৰৰ পানী। সাগৰৰ পানী ব্যৱহাৰ কৰি হামাছক পুলিয়ে পোখায়ে উভালিব ইজৰাইলে। ইতিমধ্যে ইজৰাইলৰ হাজাৰ হাজাৰ মিছাইলত ধ্বংসস্তুপত পৰিণত হৈছে গাজা। ইয়াৰ পাছতো হামাছৰ বিৰুদ্ধে ইজৰাইলে অব্যাহত ৰাখিছে যুদ্ধ। ইজৰাইলী সেনাৰ বাবে প্ৰত্যাহ্বান হৈ থিয় দিছে হামাছৰ সুৰংগসমূহ। সুৰংগবোৰ ক’ত আৰম্ভ হয় আৰু ক’ত শেষ হয় সেয়া বিচাৰি উলিওৱাটো কঠিন।বহুসময়ত হামাছ উগ্ৰপন্থীয়ে এটা ঘৰৰ পৰা সুৰংগ খনন কৰে, যিটো সীমান্তৰ সিপাৰে থকা আন এটা ঘৰত শেষ হয়। হামাছৰ এই সুৰংগবোৰ ধ্বংস কৰিবলৈ ইজৰাইলে গ্ৰহণ কৰিছে অভিনৱ পন্থা। গাজাত থকা হামাছৰ সুৰংগবোৰ সাগৰৰ পানীৰে পূৰ কৰি দিছে ইজৰাইলে। বাইডেন প্ৰশাসনৰ একাংশ বিষয়াই কয় যে পানীয়ে সুৰংগবোৰ সম্পূৰ্ণৰূপে ধ্বংস কৰি দিব আৰু ভৱিষ্যতে এই সুৰংগ হামাছে ব্যৱহাৰ কৰিব নোৱাৰিব। সুৰংগবোৰ সম্পূৰ্ণৰূপে সাগৰৰ পানীৰে ভৰ্তি কৰিবলৈ দীঘলীয়া সময় ল’ব বুলি একাংশই ধাৰণা কৰিছে। অৱশ্যে এই বিষয়ে তথ্য প্ৰকাশ কৰা নাই ইজৰাইলী সেনাই।
