নিউজ ডেস্ক, ২১ নৱেম্বৰঃ এটা শিহৰণকাৰী ঘটনা । এইবাৰ বাঘৰ সলনি ওলাইছে মানুহৰুপী দানৱ । নিশংসভাৱে প্ৰহাৰ কৰা হ’ল এটা ঢেঁকীয়াপটীয়া বাঘক । এই ঘটনা সংঘটিত হৈছে কলিয়াবৰৰ শিলাঘাটত । যিটো ঘটনাই জোকাৰি গৈছে সমগ্ৰ ৰাজ্য ।
উল্লেখ্য যে বিগত কেইমাহমান ধৰি কলিয়াবৰত সংঘটিত হৈ আছে ঢেঁকীয়াপটীয়া বাঘৰ আক্ৰমণ । ঠায়ে ঠায়ে মানুহ, জীৱ-জন্তকে ধৰি ঘৰ-দুৱাৰত আক্ৰমণ চলাই আহিছে ঢেঁকীয়াপটীয়া বাঘে । তাৰ মাজতে বুধবাৰে তথা ২০ নৱেম্বৰত সংঘটিত হয় এক জঘন্য কাণ্ড । এটা ঢেকীয়াপটীয়া বাঘলৈ অতি নিৰ্মমভাৱে শিলাবৰ্ষণ কৰি আক্ৰমণ কৰে এচাম দুৰ্বৃত্তই । বাঘটো হাবিলৈ গৈ থকাৰ অৱস্থাতে নদীত সংঘটিত হয় এই ঘটনা ।
শিলাবৰ্ষণেৰে চকু, মুখ নাকত আঘাত কৰে দুবছৰ ধৰি কলিয়াবৰৰ শিলাঘাটতত আশ্ৰয় লৈ থকা আপুৰুগীয়া ঢেকীয়াপটীয়া বাঘটোক । সেই দৃশ্য বন্দী হৈছে কেমেৰাত । গুৰুতৰভাৱে আঘাতপ্ৰাপ্ত হোৱাৰ বাবে নদীখনতে চটফটাই থাকিল বাঘটো । তাৰ পিছতো একেৰাহে শিলাবৰ্ষণ কৰি গৈছিল বাঘটোৰ ওপৰত । এই কাণ্ডই উদঙাই দিলে একাংশ মানুহৰ প্ৰকৃত স্বৰূপ । সংবাদকৰ্মী আৰু স্থানীয় লোকে বাধা আৰোপ কৰিও পৰিস্থিতি নিয়ন্ত্ৰণ কৰাত ব্যৰ্থ হয় ।
অভিযোগ অনুসৰি এই ঘটনা সংঘটিত হোৱাৰ ৫ ঘণ্টাৰ পাছতহে ঘটনাস্থলীত উপস্থিত হয় নগাঁৱৰ বন বিষয়া । সম্প্ৰতি সংকটজনক অৱস্থাত আছে ঢেঁকীয়াপোটীয়া বাঘটো ।
