মেক্সিকোৰ উত্তৰ প্ৰান্তৰ দূৰাংগোত সংঘটিত হৈছে এক ভয়ংকৰ বিমান দুৰ্ঘটনা। দুখন ব্যক্তিগত বিমান দুৰ্ঘটনাগ্ৰস্ত হৈ এটি শিশুসহ পাঁচজন লোকৰ মৃত্যু হয়। স্থানীয় প্ৰশাসনে এই তথ্য প্ৰদান কৰে।
সোমবাৰে পুৱা পশ্চিম দূৰাংগোৰ লা গেলানচিটা চহৰত সংঘটিত হয় এই দুৰ্ঘটনা। ৰাজ্যৰ নিৰাপত্তা সচিবালয়ে এটা নিউজ এজেন্সিক জনোৱা মতে, এখন উৰণ আৰু আনখন অৱতৰণ কৰাৰ সময়তে দুয়োখন বিমানৰ সংঘৰ্ষ হয়। আৰু লগে লগে দুয়োখন বিমান জ্বলি উঠে।
চৰকাৰী সংস্থাটোৱে জনোৱা মতে, এই দুৰ্ঘটনাত ৫জন যাত্ৰীৰ মৃত্যু হয়। বিমান কৰ্তৃপক্ষই দুৰ্ঘটনাৰ কাৰণৰ তদন্ত অব্যাহত ৰাখিছে।
উল্লেখ্য যে যোৱা ১০ দিনৰ ভিতৰত এইটো আছিল দ্বিতীয় বৃহৎ বিমান দুৰ্ঘটনা।
কিছুদিন পূৰ্বে অৰ্থাৎ ১৬ ছেপ্টেম্বৰ শনিবাৰে ব্ৰাজিলত সংঘটিত হৈছিল এক ভয়ংকৰ বিমান দুৰ্ঘটনা। ব্ৰাজিলৰ আমাজন বৰ্ষাৰণ্যত দুৰ্ঘটনাগ্ৰস্ত হৈছিল এখন সৰু যাত্ৰীবাহী বিমান। দুৰ্ঘটনাটোত বিমানখনত থকা ১৪ জন লোকেই মৃত্যুমুখত পৰিছিল।
