মৰ্মান্তিক দুৰ্ঘটনা ! অভিনেতাৰ গাড়ীৰ খুন্দাত মৃত্যু এগৰাকী মহিলাৰ; নাগাভূষণক গ্ৰেপ্তাৰ । ISHAN NEWS…
দুৰ্ঘটনা সংগটিত কৰাৰ অপৰাধত কানাড়া চলচ্চিত্ৰ অভিনেতা নাগাভূষণ এছ এছক গ্ৰেপ্তাৰ কৰা হৈছে। অভিযোগ অনুসৰি, অভিনেতাগৰাকীৰ গাড়ীৰ খুন্দাত এগৰাকী ৪৮ বছৰীয়া মহিলাৰ মৃত্যু হোৱাৰ লগতে ৫৮ বছৰীয়া এজন লোক আহত হৈছিল। এই অভিযোগতে অভিনেতাগৰাকীক গ্ৰেপ্তাৰ কৰা বুলি দেওবাৰে আৰক্ষীয়ে জনায়।
যোৱা ৩০ ছেপ্টেম্বৰৰ নিশা বাংগালুৰুৰ বসন্তপুৰা মেইন ৰোডত সংঘটিত হৈছিল এই দুৰ্ঘটনা।
আৰক্ষীয়ে জনোৱা মতে, প্ৰেমা এছ (৪৮) আৰু কৃষ্ণ বি (৫৮) নামৰ স্বামী-স্ত্ৰীয়ে ফুটপাথত খোজ কাঢ়ি গৈ থকা অৱস্থাত অভিনেতাগৰাকীৰ গাড়ীখনে তেওঁলোকক খুন্দিয়ায়। লোক দুজনক খুন্দিওৱাৰ পিছত বাহনখনে বিদ্যুতৰ খুঁটাত খুন্দা মাৰে।
জানিব পৰা অনুসৰি, উত্তৰাহল্লীৰ পৰা কননাকুণ্টে ক্ৰছ অভিমুখে নিজৰ গাড়ীখন চলাই আহিছিল অভিনেতাগৰাকীয়ে।
অভিনেতাগৰাকীয়ে গাড়ীখন তীব্ৰবেগত তথা নিয়ন্ত্ৰণহীনভাৱে চলোৱাৰ অভিযোগ উত্থাপন কৰে প্ৰত্যক্ষদৰ্শীয়ে।
দুৰ্ঘটনাটো সংঘটিত হোৱাৰ পিছতে গুৰুতৰভাৱে আহত দম্পতীহালক ততাতৈয়াকৈ ব্যক্তিগত চিকিৎসালয়লৈ প্ৰেৰণ কৰা হয়। কিন্তু চিকিৎসালয়লৈ যোৱাৰ পথত আঘাতপ্ৰাপ্ত মহিলাগৰাকীৰ মৃত্যু হোৱাৰ বিপৰীতে স্বামী চিকিৎসাধীন হৈ আছে।
এই ঘটনাৰ পিছতে ঘটনাস্থলীত আৰক্ষীৰ লোক উপস্থিত হৈ বিষয়াসকলে নাগাভূষণক গ্ৰেপ্তাৰ কৰে।
কেইবাখনো চিনেমাত বিশেষকৈ ৰসিক চৰিত্ৰত অভিনয় কৰি জনপ্ৰিয় হোৱা অভিনেতাগৰাকীৰ বিৰুদ্ধে আৰক্ষীয়ে এটা গোচৰ ৰুজু কৰি অধিক তদন্তৰ বাবে গাড়ীখন জব্দ কৰা হৈছে।
