জোৰাম পিপলছ মুভমেণ্টৰ নেতা লালডুহোমাই শুকুৰবাৰে মিজোৰামৰ মুখ্যমন্ত্ৰী হিচাপে শপত গ্ৰহণ কৰে। ৰাজ্যপাল হৰি বাবু কাম্ভমপতিয়ে লালডুহোমাক পদ আৰু গোপনীয়তাৰ শপত বাক্য পাঠ কৰোৱায়।
সাতগৰাকী কেবিনেট পদবী আৰু চাৰিগৰাকী ৰাজ্যিক মন্ত্ৰীকে ধৰি মুঠ এঘাৰজন মন্ত্ৰীক কাৰ্যভাৰ আৰু গোপনীয়তাৰ শপত বাক্য পাঠ কৰোৱা হয়।
উল্লেখণীয় যে, কেবিনেটৰ একমাত্ৰ মহিলা মন্ত্ৰী হৈছে লালৰিনপুই। জানিব পৰা অনুসৰি লালৰিনপুইক স্বাস্থ্য আৰু পৰিয়াল কল্যাণ, সমাজ কল্যাণ আৰু জনজাতি পৰিক্ৰমা, মহিলা আৰু শিশু উন্নয়ন আৰু পৰ্যটন বিভাগৰ দায়িত্ব প্ৰদান কৰা হৈছে।
প্ৰতিবেদন অনুসৰি, জেড পি এমৰ লুংলেই জিলাৰ অধ্যক্ষা লালৰিনপুই মিজোৰামৰ ইতিহাসত মন্ত্ৰী হোৱা তৃতীয়গৰাকী মহিলা। তেওঁৰ পূৰ্বে ১৯৮৭ চনত লালহিমপুই হামাৰ আৰু ২০১৭ চনত আছিল ভানলালাভামপুই চাভাংথু। দুয়োগৰাকীয়ে আছিল ৰাজ্যিক মন্ত্ৰী।
এই বিধানসভা নিৰ্বাচনত লালৰিনপুইয়ে লুংলেই ইষ্টত কংগ্ৰেছ প্ৰাৰ্থী জোচেফ লালহিমপুয়াক ১৬৪৬টা ভোটৰ ব্যৱধানত পৰাস্ত কৰে। ২০১৮ চনৰ বিধানসভা নিৰ্বাচনতো নিৰ্দলীয় প্ৰাৰ্থীৰূপে একেটা সমষ্টিৰ পৰাই প্ৰতিদ্বন্দ্বিতা কৰিছিল যদিও এমএনএফৰ লোমাভমা টোচাৱাঙৰ হাতত মাত্ৰ ৭২টা ভোটত পৰাস্ত হৈছিল।
ৰাজনীতিত সফল হোৱাৰ উপৰি লালৰিনপুইয়ে বেংগালুৰুত উত্তৰ-পূবৰ ছাত্ৰ-ছাত্ৰীৰ বাবে এটা হোষ্টেলও চলাই আছে।
১৯৬১ চনত জন্মগ্ৰহণ কৰা লালৰিনপুই ২০০২ চনত কানপুৰস্থিত চত্ৰপতি চাহু জি মহাৰাজ ইউনিভাৰ্চিটিৰ পৰা ক’লা শাখাত স্নাতক ডিগ্ৰী লাভ কৰিছিল। তেওঁৰ স্বামীৰ নাম হৈছে সপ্তংগা খোৱাহ্ৰিং।
উল্লেখ্য যে, লালৰিনপুইৰ উপৰি এইবাৰ আৰু দুগৰাকী মহিলা বিধানসভালৈ নিৰ্বাচিত হৈছে। তেওঁলোক ক্ৰমে, জেড পি এমৰ বেৰিল ভান্নেইহছাংগী আৰু এম এন এফৰ প্ৰভো চকমা।
