দেওবাৰে সন্ধিয়া তেলংগানাৰ নাৰায়ণপেট জিলাৰ মখতাল মণ্ডলৰ জাকলেৰ গাঁৱৰ সমীপত সংঘটিত হোৱা এক ভয়ংকৰ পথ দুৰ্ঘটনাত তিনিগৰাকী মহিলাসহ পাঁচজন লোক থিতাতে নিহত হোৱাৰ লগতে আন দুজন লোক গুৰুতৰভাৱে আহত হয়।
প্ৰাপ্ত খবৰ অনুসৰি নিহতসকলৰ ভিতৰত আছে ভাৰতীয় নৌসেনাৰ এজন কৰ্মচাৰীৰ পত্নী আৰু কন্যা।
উপলব্ধ তথ্য অনুসৰি ভাৰতীয় নৌসেনাৰ দীপক সমল নামৰ বিষয়াজনে তেওঁৰ পৰিয়ালৰ সদস্যৰ লগত কাৰৱাৰৰ পৰা হায়দৰাবাদলৈ গাড়ীৰে গৈ থকা অৱস্থাত হায়দৰাবাদৰ পৰা আহি থকা আন এখন বাহনৰ লগত ভয়ংকৰ সংঘৰ্ষ হয়।
হায়দৰাবাদৰ পৰা কৰ্ণাটকৰ নীলাহল্লী গাঁৱলৈ আহি থকা বাহনখনত খলীল, মৌলালি আৰু ৰহিমা বেগম নামৰ আন তিনিগৰাকী লোক আছিল।
আৰক্ষীয়ে জনোৱা মতে, দীপক সমলৰ পত্নী প্ৰভিতা (৩২) তেওঁৰ কন্যা অস্মিতা (৭), থিতাতে নিহত হোৱাৰ বিপৰীতে আনখন গাড়ীত থকা খলিল, মৌলালি আৰু ৰহিমা বেগমৰো থিতাতে মৃত্যু হয়।
দীপক সমল আৰু আন এজন আহত ব্যক্তিক চিকিৎসালয়লৈ প্ৰেৰণ কৰা হৈছে যদিও তেওঁলোকৰ অৱস্থা সংকটজনক।
