পৃথিৱীৰ বাহিৰে আন কোনো গ্ৰহত জীৱ আছে নেকি? বিশ্বব্ৰহ্মাণ্ডত পৃথিৱীৰ দৰে কোনো গ্ৰহ আছেনে? সাধাৰণ মানুহৰ লগতে জ্যোতিৰ্বিজ্ঞানীসকলৰ মনতো এই প্ৰশ্ন উত্থাপন হৈ আহিছে।
দীৰ্ঘদিন ধৰি বিজ্ঞানীসকলে পৃথিৱী সদৃশ গ্ৰহৰ সন্ধান কৰি থকাৰ সময়তে বিজ্ঞানীসকলে এটা গ্ৰহ আৱিষ্কাৰ কৰিছে, যিটো পৃথিৱীতকৈও ডাঙৰ। ইয়াৰ লগতে এই গ্ৰহটো ইয়াৰ সূৰ্য্যৰ বসবাসযোগ্য অঞ্চলত আছে। জ্যোতিৰ্বিজ্ঞানীসকলে আৱিষ্কাৰ কৰা TOI-715 b নামৰ গ্ৰহটো পৃথিৱীৰ পৰা ১৩৭ আলোকবৰ্ষ দূৰত্বত আছে।
এই গ্ৰহটোক বিজ্ঞানীসকলে ‘ছুপাৰ আৰ্থ’ বুলি অভিহিত কৰিছে। TOI-715 b পৃথিৱীতকৈ প্ৰায় ডেৰগুণ বহল। গ্ৰহটো এনে এক কক্ষপথত আছে যিয়ে ইয়াক ইয়াৰ নক্ষত্ৰৰ পৰা ঠিক সঠিক দূৰত্বত ৰাখে। জুলীয়া স্তৰতেই পানীৰ উপস্থিতি গ্ৰহটোত থাকিব পাৰে বুলি ধাৰণাও কৰিছে কেইবাগৰাকী বিজ্ঞানীয়ে।
বসবাসযোগ্য গ্ৰহ এটা নিজৰ নক্ষত্ৰৰ পৰা ইমান দূৰত্বত থাকিব লাগে য’ত উপস্থিত পানী গৰমৰ বাবে বাষ্পীভৱন বা শীতৰ বাবে বৰফলৈ পৰিণত নহয়। উপযুক্ত পৰিৱেশকে ধৰি বহু কাৰকৰ ওপৰত পানীৰ অস্তিত্ব নিৰ্ভৰ কৰে।
উল্লেখ্য যে, এই নতুন গ্ৰহৰ আৱিষ্কাৰে বিজ্ঞানীসকলক অধিক অধ্যয়নৰ বাবে অনুপ্ৰাণিত কৰিছে। বিজ্ঞানীসকলৰ মতে এই গ্ৰহটো অতি ভাল সময়ত আৱিষ্কাৰ হৈছে, কাৰণ বৰ্তমান সময়ত প্ৰযুক্তিৰ বিকাশ ঘটিছে।
সম্প্ৰতি বিজ্ঞানীসকলৰ ওচৰত আছে জেমছ ৱেব স্পেচ টেলিস্কোপৰ দৰে যন্ত্ৰ। ই দূৰৈৰ বহিঃগ্ৰহ ধৰা পেলায়। ইয়াৰ লগতে ইহঁতৰ বায়ুমণ্ডলীয় গঠনো বিশ্লেষণ কৰিব পাৰি। এনে তথ্যই সৌৰজগতৰ বাহিৰত জীৱনৰ সম্ভাৱনা সম্পৰ্কে গুৰুত্বপূৰ্ণ তথ্য প্ৰদান কৰিব পাৰে।
আৱিষ্কৃত TOI-715 b ৰ নক্ষত্ৰটো হৈছে ৰঙা বামন। ই সূৰ্য্যতকৈ সৰু আৰু ঠাণ্ডা। ইয়াৰ ফলত শিলৰ গ্ৰহত উৰ্বৰ ভূমি উৎপন্ন হোৱাৰ সম্ভাৱনা আছে।
উল্লেখ্য যে, মহাবিশ্বত গ্ৰহৰ অনুসন্ধানৰ বাবে প্ৰেৰণ কৰা কৃত্ৰিম উপগ্ৰহ টিইএছএছে নতুন গ্ৰহটোৰ অৱস্থান নিশ্চিত কৰিছে।
