বুধবাৰে নিশা কেৰালাত সংঘটিত হৈছে এক ভয়ংকৰ পথ দুৰ্ঘটনা। ৰাজ্যখনৰ পংকুন্নাম-পালা পথত সংঘটিত দুৰ্ঘটনাত তিনিজন লোকে প্ৰাণ হেৰুৱাইছে।
জানিব পৰা মতে, তীব্ৰ বেগী এখন জীপে নিয়ন্ত্ৰণ হেৰুৱাই এখন অটো ৰিক্সাত প্ৰচণ্ড খুন্দা মাৰে। এই সংঘৰ্ষৰ পিছতেই তিনিচকীয়া বাহনখনৰ ভিতৰত থকা তিনিজন যাত্ৰীৰ মৃত্যু হয়।
দুৰ্ঘটনাটোত মৃত্যু হোৱা লোক কেইজনক ক্ৰমে আনন্দ (২৪), বিষ্ণু আৰু শ্যাম লাল। আনহাতে অটোখনৰ ভিতৰত থকা আন দুজন যাত্ৰী গুৰুতৰভাৱে আঘাতপ্ৰাপ্ত হোৱাত তেওঁলোকক কোট্টায়ম চিকিৎসা মহাবিদ্যালয়ত ভৰ্তি কৰোৱা হৈছে।
ইলামগুলামৰ এজন স্থানীয় লোকে চলোৱা জীপখনে কোৰালী অভিমুখে গৈ থকা অটোখনত খুন্দা মাৰিছিল।
দুৰ্ঘটনাটোত প্ৰাণ হেৰুওৱা লোক কেইজন ব্যক্তিগত বাছৰ কৰ্মচাৰী বুলি জানিব পৰা গৈছে। বৰ্তমান তেওঁলোকৰ মৃতদেহ কাঞ্জিৰাপল্লী জেনেৰেল চিকিৎসালয়ৰ মৰ্গত ৰখা হৈছে।
