ফুটপাথত শুই থকা আৰ্তজনক সহায়; আফগান ক্ৰিকেটাৰৰ মহান কৰ্মই জিনিছে হৃদয়, ভাইৰেল ভিডিঅ’
ভাৰতত চলি থকা এদিনীয়া বিশ্বকাপৰ ছেমি ফাইনেলত স্থান নিশ্চিত কৰিব নোৱাৰিলে আফগানিস্তানে। কিন্তু প্ৰতিযোগিতাখনত দলটোৰ খেলুৱৈসকলে দেখুওৱা প্ৰদৰ্শনে বিশ্বৰ ক্ৰিকেট অনুৰাগীৰ হৃদয় জয় কৰিবলৈ সক্ষম হৈছে।
আফগানিস্তানৰ খেলুৱৈসকলক লৈ চৰ্চা চলি থকাৰ মাজতে দলটোৰ প্ৰতিভাৱান বেটছমেন ৰহমানুল্লাহ গুৰবাজে এনে এটা মহান কাম কৰিছে যিটো বৰ্তমান ছ’চিয়েল মিডিয়াত ব্যাপকৰূপত ভাইৰেল হৈ আছে।
আফগানিস্তানৰ এইগৰাকী বেটছমেনে ফুটপাথত শুই থকা দৰিদ্ৰ লোকৰ মাজত ধন বিতৰণ কৰিছে যাতে তেওঁলোকে দীপাৱলীৰ উৎসৱ ধুমধামেৰে পালন কৰিব পাৰে।
ছ’চিয়েল মিডিয়াত ভাইৰেল হোৱা এই ভিডিঅ’টোৱে ৰাইজৰ যথেষ্ট মৰম আদৰ লাভ কৰিছে।
ছ’চিয়েল মিডিয়াত ভাইৰেল হোৱা এটা ভিডিঅ’ত দেখা গৈছে যে গুৰবাজে আহমেদাবাদৰ ৰাজপথত আৰ্তজনক নীৰৱে ধন বিতৰণ কৰিছে যাতে তেওঁলোকে সুখেৰে দীপাৱলী পালন কৰিব পাৰে।
ৰহমানুল্লাহ গুৰবাজে ৰাস্তাত শুই থকা মানুহ কেইজনৰ কাষতে মনে মনে টকা বিতৰণ কৰ গাড়ীত উঠি তাৰ পৰা আঁতৰি যায়।
পাব্লিচিটি ষ্টাণ্ট নিবিচৰা ক্ৰিকেটাৰগৰাকীৰ এই কাম অন্য কোনো লোকে কেমেৰাত আৱদ্ধ কৰি ছ’চিয়েল মিডিয়াত এৰি দিয়ে। আৰু ইয়াৰ পিছতে এই ভিডিঅ’টোৱে লাখ লাখ লোকৰ হৃদয় জিনিছে আৰু ক্ৰিকেটাৰগৰাকীক প্ৰশংসাৰে উপচাই পেলাইছে।
এই ভিডিঅ’টো প্ৰথমে মুফাদ্দাল বোহৰা নামৰ এজন লোকে এক্স (টুইটাৰ)ত শ্বেয়াৰ কৰিছে। ভিডিঅ’টোৰ কেপচনত লিখিছে- ‘ৰহমানুল্লাহ গুৰবাজে আহমেদাবাদৰ ৰাজপথত আৰ্তজনক মনে মনে ধন প্ৰদান কৰিছে যাতে তেওঁলোকে দীপাৱলী পালন কৰিব পাৰে।’
বৰ্তমানলৈকে এই ভিডিঅ’টো ৯৮১.৩ হাজাৰ লোকে চাইছে। ভিডিঅ’টোক লৈ ব্যৱহাৰকাৰীসকলেও তীব্ৰ প্ৰতিক্ৰিয়া প্ৰকাশ কৰিছে। এজন ব্যৱহাৰকাৰীয়ে কয় যে আফগানিস্তানৰ ক্ৰিকেটাৰসকলে ভাৰতত কেৱল ষ্টেডিয়ামৰ ভিতৰতেই নহয় আৰু খেলপথাৰৰ বাহিৰতো হৃদয় জিনিছে।
উল্লেখ্য যে, চলিত বিশ্বকাপত আফগানিস্তানে লীগৰ ৯খন মেচৰ চাৰিখন জয়ী হৈ ৮ পইণ্টেৰে তালিকাৰ ষষ্ঠ স্থানত আছে। দলটোৱে প্ৰতিযোগিতাখনত ইংলেণ্ড, পাকিস্তানৰ দৰে ডাঙৰ দলক পৰাস্ত কৰিছে।
