উত্তৰ প্ৰদেশৰ চুলতানপুৰ জিলাৰ পূৰ্বাঞ্চল এক্সপ্ৰেছ ৱেত শুকুৰবাৰে পুৱা সংঘটিত এক দুৰ্ঘটনাত ৩ জন লোকৰ মৃত্যু হয়। মৃত আটাইকেইজন লোকে গাড়ীৰে লক্ষ্ণৌৰ পৰা বিহাৰলৈ গৈ আছিল।
জানিব পৰা মতে, গাড়ীখনে নিয়ন্ত্ৰণ হেৰুৱাই পথৰ ডিভাইডাৰত খুন্দিওৱাৰ ফলত এই কৰুণ দুৰ্ঘটনাটো সংঘটিত হয়।
এই মৰ্মান্তিক দুৰ্ঘটনাত পতি-পত্নীৰ লগতে আন এগৰাকী মহিলাৰ থিতাতে মৃত্যু হয়। গুৰুতৰভাৱে আহত এজন চিকিৎসাধীন হৈ আছে।
শুকুৰবাৰে পুৱা প্ৰায় ৭ বজাত লক্ষ্ণৌৰ পৰা বিহাৰ অভিমুখে গৈ থকা এখন তীব্ৰবেগী গাড়ীয়ে কুৰেভৰ থানা এলেকাৰ ছেউৰ গাঁৱৰ সমীপৰ পূৰ্বাঞ্চল এক্সপ্ৰেছ ৱে’ত ডিভাইডাৰৰ সৈতে সংঘৰ্ষত লিপ্ত হয়।
দুৰ্ঘটনাটোৰ তথ্য লাভ কৰাৰ পিছতে সেই স্থানত বহু লোক গোট খায়। দুৰ্ঘটনাটোত গুৰুতৰভাৱে আহত লোকজন সন্দৰ্ভত চিকিৎসকে কয় যে তেওঁ গুৰুতৰভাৱে আঘাতপ্ৰাপ্ত হৈছে। এতিয়াই একো ক’ব পৰা নাযায়।
