ঝাৰখণ্ডত সংঘটিত হৈছে এক ভয়াৱহ পথ দুৰ্ঘটনা। অটোৰিক্সা আৰু ট্ৰাকৰ মাজত হোৱা সংঘৰ্ষত ৫ জন লোকৰ কৰুণ মৃত্যু হোৱাৰ বিপৰীতে ৬ জন আহত হোৱা বুলি জানিব পৰা গৈছে।
দুৰ্ঘটনাটোত মৃত্যু হোৱা আটাইকেইজন লোক অটোৰিক্সাৰে যাত্ৰা কৰি আছিল।
গড়ৱা জিলাৰ বংশীধৰ নগৰ থানা এলেকাৰ পালহে গাঁৱৰ সমীপত নিশা প্ৰায় ১.৩০ বজাত সংঘটিত হয় এই দুৰ্ঘটনা। ঘটনা সন্দৰ্ভত তথ্য পোৱাৰ লগে লগে আৰক্ষীয়ে ততাতৈয়াকৈ সেই স্থানত উপস্থিত হৈ আহতসকলক ওচৰৰ চিকিৎসালয়ত ভৰ্তি কৰে।
জানিব পৰা মতে, অটোৰিক্সাত মুঠ ১২ জন লোকে যাত্ৰা কৰিছিল। ভাৰপ্ৰাপ্ত আৰক্ষী বিষয়া আদিত্য নায়কে জনোৱা মতে এই আটাইকেইজন লোক ৰে’ল ষ্টেচনলৈ গৈ আছিল।
কিন্তু তেওঁলোকৰ অটোৰিক্সাখনে সন্মুখৰ পৰা অহা এখন ট্ৰাকৰ সৈতে খুন্দা মৰাৰ ফলত থিতাতে ৫ জন লোকৰ মৃত্যু হয়। ট্ৰাকখন অতি তীব্ৰ বেগেৰে আহি আছিল বুলি জানিব পৰা গৈছে।
